 |
 |
CHARTER (Чартер) – едэйвана пявы проект. Манзаяда Европейский Союзхад Horizon 2020 программа’ сэр” салбамбада. Тикы манзаям’ климат’ ӈули’ мэр” несэймава нямна тикахад ям’ мэ”мам’ сававна таслава е”эмня пядунзь.
Тикы манзая нюм’ английской вади Drivers and Feedbacks of Changes in Arctic Terrestrial Biodiversity хэбяцякувна серта”ма. Ненэй вадавна хэта ӈамгэхэд нумва минаць несэйворӈам’ тасламби”. Тикахад тюку илӈгана” ӈэрм’ яна’ тиӈгы” хобада, нум’ сармик” тенз” тяхакуй то”лаха” ни”ӈа, несэйвормамдо’ хусувэй хибя хамадамбида.
Тет пон таславы проект тюку по’ пилю” ирыхад манзара пядась. Тикахана хасава юкад’ вата параӈода ёхот’ тэравы” сидя ю” ӈопой научно-исследовательской институт манзара”. Серо’ пэртядо’ Лапландской Университ’ Арктической центрахана манзарана – профессор Брюс Форбс.
Тикы проектахана Россия’ яна”, Европа’ ӈэрм’ ё несэйвормам’ тохоламбаӈго’. Нумда (климатда) несэйворӈам’, ям’ несэйвормам’, Арктика’ сармик” тенз” несэйвормам’ маӈэсарта”. Ханзер’ сырада еӈгама, итя ӈабтена яв’ салаба ӈамгэ сусана. Тикы хавна, сэрерта ханзер’ холкаӈгавам’, ӈэрм’ яна’ климат несэйворӈам’ манэсарта”.
Нумда’ несэйворо”мам’ учёный” хавна тэхэна” мэна” ненэця хусувэй ялэ” маниейдо’. Манзаяханандо’ ты” сава хадолава” ӈули’ тара”. 2013/14 салаба похона ӈока ӈенэця’ ты” хаць. Тамальӈгана я’ хоба ний салабаӈэ хаясь. Ямал’ няна иленя” ненэця” тикы похона тыто’ хадо’ салаба’ ӈылна еремяць. Нядам’ нись ху”, тивто’ терся, вынхала 61000 ты хаць. Теда’ Ямало-Ненецкий округ’ тиӈгэвна мале сян” районхана ненэця” тэсялмаць. Ӈокаюм’ пелядо’, тыдо’ вадабава е”эмня, нядэ ха”мыдаць, маси’ тад нерняна, тэдомдо’ вадава сер”, ӈани’ тарця сэрад по” пирдалеӈгудо’. 2019/2020 похона Финляндияхана илена” ты” пэртя” ӈани’ сэрдан’ еремяць. Салабахад 15000 ты хавысь, ты” пэртя” забойкан’ миць тыдо’ яӈгувы, ясядамдо’ нивы” ня”ам”. Тики сэрдахад манзаядо’ тамна тоянанаӈэ хаясь. Ты – ӈэрм’ няна сямян’ тарана я’ сармик. Тикы хавна, ты” яна’ экосистема сававна манзарава е”эмня ӈули’ тара”.
Ӈабцата, ты” пэрма манзая, ты” хадолава ё сававна мэ”ма, яна’ несэйворомам’ таб”ламби, я’ ӈылы сэрадм’ томдамби. Ты” таӈы’ ельцяӈгана нядам’ вуни” ӈавор”. Ӈуво, неро’ вэбам’ ӈорӈа”, тарем’ ты” регионна’ климатм’ ӈани’ несэймдась пирӈа”до’. CHARTER ӈэрм’ ненэцие ня” ӈобкана манзарава е”эмня таславы проект: ханзер’ нэрм’ тер” нум’ несэйвормам’ тасламби”, илӈганандо’ хуркавна теберӈа.
Тикы’ хавна, CHARTER я’ мидхы ява’ хурка ӈэвам’ тохоламби, хурка я’ сармик” илевы”, нумда хурка ӈэвы, салабанда, сыранда хурка ӈэвам’ ӈани’ тасламбидо’. Тикым’ голоцен’ периодхад манэтадо’ (11 000 по техэй’). Таремӈгав”, ӈабцата 40 по техэй’ нум’ хурка ӈэвам’ ӈани’ тохоламбаӈгудо’.
CHARTER манзаям’ ты” пэрти” ня’, я’ ний, я’ мюйм’ сабкабада манзарани” ня’ ӈобкана тэртадо’. Тикы манзая сер”таслаӈгудо’ ханзер’ ӈобкана манзара сава, хуркавна несэйворта нум’ теневавам’ серта сава ӈэӈгу, ханзер’ тикы тасалковам’ регионва” нерня минре пиртада, илӈганана” тарабцода хурка ӈэӈгу.
Тикы’ е”эмня проектана’ цель тарця: ӈэрм’ няна илени” ненэцие едэй ила’ нямна, климат’, я’ хоба’ несэймдава’ нямна, идо’ ядорабцо” хурка ӈэвам’ хонрамба тара. Тарця” ӈэрм’ ненэцие ила’ тасако”ма 2050 ӈэсонд’ сертабада изменения климата сценарий падыбади” манзаян’ ӈули’ тара. Маня” проектана’ задачада тикы хавна тарця – Арктика яна” серо’ тасламбда” ӈэрм’ няна илени” ненэцие” вабцан’ инзебто’, ӈэрм’ ненэцие” ила’ мэсыдм’ манзаяханадо’ ӈани’ тасламбто’, тикахана, Арктика ё’ нямна ӈэда манзаямдо’ тарабтаӈгу. Климат несэйворома’ тохоламбавам’, регион” нерня’ мива манзаям’ нядаӈгу.
CHARTER проектава 7 пеляхад пере. Хусувэй пелянда’ манзаям’ нерня пэртидо’ таня”.
Тикы хавна серо” тасламабадаӈэ ты” пэртя”, Округ тиӈгэвна администрацияхана манзарани” ерв”, министерствахана тарана”, наука вади нерня’ хэтабада” ӈани’ таня”.
Ненэй вадавна хонаркова е”эмня Роза Лаптэян’ паднада”: roza.laptander@ulapland.fi